Песнь 5.

Ирмос: Света Подателю и веков Творче Господи, во свете Твоих повелений настави нас: разве бо Тебе иного бога не знаем

Припев: Избави от бед, Спасе, раба Твоего (или, рабу Твою), яко Милосерд.

Езекиины иногда молитвы исполнивый Господи, и мою исполни вскоре Едине Блаже, и спаси раба Твоего (или, рабу Твою) от всякого озлобления.

Ангельскими руками, верховного ученика Господи, из темницы божественною силою иногда изведый, избави Твоего раба (или, Твою рабу), люте бедствующа (или, бедствующу).

Слава: Ангельския воинства, апостолов, пророков, собор же всеславных мученик, преподобных, о сущем (или, сущей) в лютых, купно молитву сотворите.

И ныне: Мати Христа Бога, ускори избавити верногораба твоего (или, верную рабу твою) от лютыя нужды и беды ныне нашедшия, да тя славит сердцем и усты.

Песнь 6.

Ирмос: В бездне греховней валяяся, неизследимую милосердия Твоего призываю бездну: от тли Боже мя возведи.

Припев: Избави от бед, Спасе, раба Твоего (или, рабу Твою), яко милосерд.

Китова чрева избавивый древле пророка Твоего Владыко Господи, и Твоего раба (или, Твою рабу) избави, да верою и любовию славит Тя.

Даниила якоже избавил еси от львов Христе, избави от бесов лукавых ныне и мене Твоего раба (или, Твою рабу), Владыко, и от истления и смерти возведи.

Слава: Бедствующа (или, бедствующу) спаси раба Твоего (или, рабу Твою), Спасе, святых ангел молитвами, пророков, мучеников же и премудрых учеников Твоих моленми.

И ныне: Не презри люте обуреваемого (или, обуреваемую), и недоумением одержимаго (или, одержимую), Отроковице, твоего раба (или, твою рабу), но обычне избави прибегающаго (или, прибегающую), под кров твой, Пречистая.

По катавасии же, глаголет священник ектинию:

Паки и паки миром Господу помолимся.

Предстоящии: Господи помилуй:

Священник: О избавлении и освобождении раба Его (или, рабыни Его), имярек, от насилия и обстояния диавольского, и вселукавого его коварства.

Предстоящии: Господи помилуй.

Священник: Заступи, спаси, помилуй и сохрани его (или, ю) и нас Боже Твоею благодатию.

Предстоящии: Господи помилуй.

Священник: Пресвятую, Пречистую, Преблагословенную:

Предстоящии: Тебе Господи.

Священник: Яко Ты еси Царь Мира:

Предстоящии: Аминь.

Кондак, глас 6.

Не имамы иныя державнейшия помощи, не имамы иныя известнейшия надежды, разве Тебе Христе Боже наш, в Него же веруем и Имже хвалимся: Ты убо нам помози, и от всякого обстояния скоро избави, Твои бо есмы рабы, да не постыдимся.

Другий кондак, глас тойже:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих ти: ускори на молитву, и потщися на умоление: предстательствующи присно, Богородице чтущих тя.

Посем священник глаголет: Вонмем, мир всем.

Предстоящии: И духови твоему.

Священник: Премудрость вонмем. Прокимен, глас 6: Боже, в помощь мою вонми, Господи, помощи ми потщися. Стих: Да возвратятся вспять и постыдятся мыслящии мне злая.

Священник: Господу помолимся.

Предстоящии: Господи помилуй.

Священник: Яко Свят еси, Боже наш, и во святых почиваещи, и Тебе славу возсылаем, Отцу, и Сыну, и Святому Духу, ныне и присно, и во веки веков.

Предстоящии: Аминь.

Священник: Всякое дыхание да хвалит Господа. Стих: Хвалите Бога во святых Его, хвалите Его во утвержении Силы Его.

Священник же: И о сподобитеся нам слышанию Святаго Евангелия Господа Бога молим.

Предстоящии: Господи помилуй, трижды.

Священник: Премудрость, прости, услышим Святаго Евангелия. Мир всем.

Предстоящии: И духови твоему.

Священник: От Марка Святаго Евангелие чтение.

Предстоящии: Слава Тебе Господи, слава Тебе.

Священник: Вонмем.

Священник же заклинаяй крепко повелев держати беснаго, над главою его книгу держа, чтет Евангелие от Марка: глава 16, зачало 71, от полу:

Во время оно, воскрес Иисус от мертвыйх, явися учеником своим, возлежащим им единонадесяте, и поноси неверствию их, и жестосердию, яко видевшим Его воставша, не яша веры. И речи им: шедше в мир весь проповедите Евангелие всей твари. Иже веру иметь и крестится, спасен будет: а иже не иметь веры, осужден будет. Знамения же веровавшим сия последуют: именем моим бесы ижденут. (Словеса же сия чтый заклинатель, десницею прикасается главы беснаго). Языки возглаголют новы: Змия возмуть: аще и что смертно испиют, не вредит их: на недужныя руки возложат, и здрави будут (Сие же чтый, поддержащу единому от клирик книгу, заклинатель руце обе возлагает на главу беснаго, и чтет прочая Святая Евангелия) Господь же убо по глаголании Его к ним, вознесеся на Небо, и седе одесную Бога. Они же изшедше проповедаша всюду, Господу поспешествующу, и слово утверждающу последствующими знаменьми, аминь.

Предстоящии поют: Слава Тебе, Господи, слава Тебе.

Заклинатель же дает бесному лобзати Святое Евангелие, и взем священную воду кропит беснаго крестообразно, глаголя:

Во имя Безначального, Несозданного, и Нерожденного, Отца +

Второе же глаголя:

И Единородного, Единосущнаго, и Собезначальнаго Сына Его, Господа нашего Иисуса Христа +

И паки третие кропит, глаголя:

И Духа Святао Животворящяго, от Отца исходящагоЮ Бога Единаго в Троице Святей Славимого и Покланяемого +

Аминь.

Песнь 8.

Ирмос: В пещь огненную ко отроком еврейским Снизшедшаго, пламень в росу Преложшаго Бога пойте, дела, яко Господа, и превозносите во вся веки.

Припев: Избави от бед, Спасе, раба Твоего (или, рабу Твою), яко Милосерд.

Павла и Силы молитвы якоже приял еси, и от уз тех избавил еси: и нас Милостиве недостойных ныне вопиющих гласы услыши, и избави раба Твоего (или, рабу Твою), от тления же и смерти.

Не отврати от мене раба Твоего (или, рабуы Твоея), Христе, Лице Твое, яко скорблю, скоро услышим я Спасе, и избави настоящия бури: нами вопиет Тебе раб Твой (или, раба Твоя), Щедре.

Слава: МолитвамиБоже, невещественных служителей и апостолов, и мученик ликов, и священных пророков, преподобных, и праведных всех, избави Твоего раба (или, Твою рабу) от лютыя беды.

И ныне: Прибежище христиан, помощнице в лютых обуреваемым Всесвятая Дево, не презри твоего раба (или, твою рабу) бедами потопляемого (или, потопляемую), и державному твоему прибегающаго (или, прибегающую) ныне покрову.

Песнь 9.

Ирмос: От Бога Бога Слова, неизреченною мудростию Пришедшаго обновити Адама, ядию в тление падшаго люте, от Святыя Девы неизреченно Воплотившагося нас ради, вернии единомудренно песньми величаем.

Припев: Избави от бед, Спасе, раба Твоего (или, рабу Твою), яко Милосерд.

Скорбная Твоего раба (или, Твоея рабы), настоящия беды, обуревание многое и лютое претвори Владыко, и преврати сего (или, сея) плачь в радость всегдашнюю: да верою и любовию непрестанно величает Тя.

Твоего многаго благоутробия да не победит Щедре, множество безмерных моих зол, но обычною Твоею милостию, нами Тебе взывает раб Твой (или, раба Твоя), спаси, и избави мя Христе от вреда всяческого, Едине Многомилостиве.

Слава: Пощади мене Господи, пощади, егда судити имаши, и не осуди мене во огнь, ни яростию Твоею обличи мене, молит Тя Дева Тебе рождшая Христе, ангел множество, и мучеников собрание.

И ныне: Пресвятая Дево, со безплотными служителями, и святыми ангелы, апостолы, пророки, мученики, и преподобными всеми, Единого Преблагаго Бога молите, избавитися от озлобления рабу твоему (или, рабе твоей).

Посем абие поют вси со умилением:
Достойно есть:

Преуготовлену убо сущу якоже преднаписася, заклинателю, поелику мощно во всем пред Божественною литургиею: повелев на земли ниц припасти бесному, и прилежно молитися. Аще есть священник,сам Божественную совершает литургию: аще ли ни, то иный священник сый да совершает, прилежно Бога моля еже благодатию Своею поспешити делу намерения его. В проскомисании убода принесет часть о недужном, глаголя молитву сию:

Господи Иисусе Христе Боже наш, вольною Твоею Страстию, и Животворящею смертию, всю силу диаволю упразднивый, и державу его разрушивый, род же человеческий от мучительства его свободивый, и верныя люди Себе присвоивый, приими жертву сию Тебе о рабе Твоем (или, орабе Твоей) имярек, мною недостойным рабом Твоим приносимую, и иждени от него (или, от нея), прилежно молимся, вселукавое диавольское действио, и невредима его (или, ю) от всякого мечтания и насилия демонского всегда соблюди. Ты бо еси Избавитель, Врач же, и Посетитель душ и телес наших, и Твоя есть Слава во веки. Аминь.

По изрядном же прочтет молитву обычную, на конце ея да глаголет:

Господи Боже наш, молимся Твоему человеколюбию, и прилежно просим, благодарне от нас приими смиренно Тебе приносимый дар и мольбу, и словесную службу о рабе Твоем (или, рабе Твоей), имярек, и благоутробне сего (или, сию) от насилия лукавого врага лести, и от всякого его наваждения, мучения и державы изми, и свободна (или, свободну) покажи. Ты бое си Бог наш, и Спас душам нашим, и Тебе славу возсылаем со Единородным Твоим Сыном, и Пресвятым Духом во веки. Аминь.

По Причащении же Божественных Таин, аще сам заклинатель священнодействует, по обычной молитве благодарной, да глаголет и сие:

Тело Твое Пресвятое, Господи Иисусе Христе Боже наш, и Кровь Твоя Всечестная, Имиже Причаститися нам человеколюбне Изволил еси, да будет нам во оставление грехови в живот вечный, в крепость же и во всеоружество на всю силу диаволю, и в победное одоление и конечное изгнание всего действа его от раба Твоего (или, от рабы Твоея) имярек, от него насильствуемаго (или, насильствуемыя). Яко Ты еси Крепость, Сила, и Утверждение наше, и Тебе славу возсылаем со Безначальным Твоим Отцем, и Пресвятым и Благим и Животворящим Твоим Духом, ныне и присно, и во веки веков.

Аминь.

Аще же не сам заклинатель служит священник служай глаголет сию молитву:

Господи Иисусе Христе Боже наш, сподобивый мое недостоинство многаго ради милосердия Твоего принести Тебе ныне сию спасительную Безкровную Жертву, и причаститеся Пречистым и Животворящим Твоим Тайнам: моля Тя прилежно, Единого Благаго и Человеколюбивогои Всесильного Бога, предстани ныне в помощь рабу Твоему, егоже избрал еси в служение сие, еже наступати на змия и скорпия, и на всю силу вражию, и подаждь ему силу, и крепость, еже возмощи крепко сопротивитися всякой силе вражией, и о Имени Твоем изгонити возмощи ему державно все диаволе насилие, насильствующее рабу Твоему (или, рабе Твоей) имярек, Ей, Господи Боже наш, да не посрамлен изыдет уповаяй на милость Твою, и на силу Державы Твоея надеяйся, но победоносец да явится о Твоей державе и Всесильной Крепости. Твое бо есть еже миловати и спасати нас, Боже наш, и Тебе славу возсылаем, со Безначальным Твоим Отцем, и со Святым Духом во веки.
Аминь.

По литургии же Божественной, аще сам заклинатель священнодействовал есть, да не слагает с себе священныя одежды, но одеян во вся да совершает последование заклинания. Аще же не сам священнодействова, и аще священник есть, да возложит на себе епитрахиль и фелонь: аще же от меньших чинов есть, в стихарь: аще же есть диакон, или иподиакон: аще же от низших, в краткий да облачится фелонь, сице яко да своего сана и чина не лишится одежды. Обращься же к беснующемуся и ко предстоящим, да творит к ним в кратце предсловие поучительное, во еже и о предлежащем деле научится им, и к теплоте молитв возбуждатися. Скончав же сие, абие велиим смирением и благоговением, аще священник есть, пред Святою Трапезою во Олтари, отверзит Царская Врата: аще же от меньших чинов, вне Олтаря пред Святыми Враты пад ниц на лицы своем, со умилением и слезами чтет Псалом 50 «Помилуй мя Боже»: до конца. Сие же творят и  предстоящии.

Ко святым апостолом, 5.

Святии славнии и всехвальнии апостоли, Петре и Павле, Андрее, Иакове, Иоанне, Филипе, Варфоломее, Фомо, Матфее, Иакове, Фаддее, Симоне, Матфие, Марко, Луко, Варнаво, со всеми прочими апостолами, семидесятьми же учениками, и всеми Христово Евангелие светло проповедовавшими, молите Бога о рабе Своем.

Ко мученикам, 6.

Святии добропобеднии мученицы, Стефане, Лаврентие, и Игнатие Богоносче, Георгие, Димитрие, Прокопие, Меркурие, Феодоре Тироне и Феодоре Стратилате, Киприане, Пантелеимоне, Космо и Дамиане, Кире, Иоанне, Ермолае, Новый Иоанне Сочавский. Чудотворнии российстии страстотерпцы, Борисе и Глебе, Антоние, Иоанне, Евстафие, в Вильне Христа ради страдавшии, преподобномученице Евстратие Печерский, и вси прочии святии мученицы, Христа ради пострадавшии, и увенчавшиися, со всеми святыми исповедниками, молите Бога о рабе Своем.

Ко святым учителем, 7.

Святии Василие Великий, Григорие Богослове, Иоанне Златоустый, Дионисие Ареопагите, Афанасие и Кирилле Александрийстии и Кирилле Иерусалимский, Григорие Нисский, Клименте, Епифание, Феофилакте, Иоанне Дамаскине, и вси святии учителие вселенстии, молите Бога о рабе Своем.

Ко святителем, 8.

Святый Николае Мирликийский, Грегорие Неокесарийский, Грирогие Арменский, Григорие Акрагантийский, Перте Антиохийский, Иоанне Милостивый, Андрее Критский, Спиридоне Тримуфийский, Петре, Алексие, Ионо, Филиппе, Ермогене Московстии, Киприане и Фотие, митрополити всея росии, Нифонте Новгородский, российстии чудотворцы, и вси святии иерарси, молите Бога о рабе Своем.

Ко святым царем и князем, 9.

Святый равноапостольный царю Константине, с великим российским князем Владимиром, Михаилом Черниговским, и Феодором Болярином его, и со всеми святыми цари и князи, молите Бога о рабе своем.

Ко преподобным, 10.

Преподобнии и богоноснии отцы наши, Павле Фивейский, Антоние Великий, Феодосие, Ефимие, Макарие, Афанасие Афонский, Савво Освященный, Марко ФраческийАфинский, Иларионе Великий, Феодоре Студийский и Феодоре Начертанный, Симионе, Данииле, и Алипие Столпницы, Алексие Человече Божий, Иоанне Кушниче, Симеоне, и Василие Христа ради юродивии, Кирилле Философе, учителю словенский, и преподобнии отцы наши Печерсткии Антоние, Феодосие, Николае Святоша, Никоне, Дамиане, Агапите, Алипие Врачеве, Григорие, Прохоре Чудотворнии, Афанасие, Лаврентие Затворницы, Иоанне, Никоне, и Исакие Многострадальнии, Пимине Многотерпеливый, Феодоре, и Василие Страстотерпцы, Иеремие, и Матфее Прозорливии, Моисею Угрине, девства ради пострадавый, Спиридоне, Никодиме Просфородейче, Еразме, Ефимие, Сергие Радонежский и Серафиме Саровский, Иове Почаевский, и вси святии девственницы, пустынницы, иноцы, в постническом подвизе Христови угодившии, молите Бога о рабе Своем.

Ко святым мученицам, и девам, 11.

Святыя Фекло, Екатерино, Варваро, Ефимие, Марино, Иустино, Анастасие, Ефросиние, Евгение, Ефросиние Полоцкая, и вся святыя девы, Христа ради пострадавшия, и преподобно пожившия, молите Бога о рабе Своем.

Ко святым женам, 12.

Святыя Анно, Елисавето, Марие Магдалино, царице Елено, великая княгине Ольга, Макрино, Мелание, Пелагие, и вся святыя мироносицы, мученицы, и преподобныя жены, Христови достойно послужившыя, молите Бога о рабе Своем.

Молитвами всех святых Твоих Господи, милостив буди нам и помилуй раба Своего (или, рабу Свою). Умилосердися Господи, и услыши нас грешных молящихся Тебе, и избави раба Своего (или, рабу Свою) от всякого зла.

Умилосердися, Творче и Искупителю наш, и очисти нас и сего раба Твоего (или, сию рабу Твою) от грехов и скверн душевных и телесных, и помилуй нас.
Умилосердися, Спасе и Избавителю наш, и отврати праведно движимый гнев Свой от нас и раба Твоего (или, от рабы Твоея), и от напрасныя и неначаемыя (внезапныя,) смерти избави, и от всех диавольских коварств, вскоре свободи его (или, ю).

Заступи, спаси, помилуй, и сохрани его (или, ю) и нас Боже Твоею благодатию, и от всякия скорби, гнева, беды, и нужды, и болезни душевныя, и телесныя, и от смерти вечныя милосердием Своим избави.

Помилуй нас Боже, по велицей милости Твоей, смиренно молимтися, услыши и помилуй раба Твоего (или, рабу Твою).

Воплощения ради Твоего, и пришествия в мир, Рождества же и Крещения, и поста святаго Твоего: Креста ради и Страдания, смерти же и погребения и Воскресения ради, и преславного Вознесения Твоего, Утешителя Духа, и Второго Страшного Твоего паки Пришествия, мы грешнии и недостойнии раби Твои, со умилением к Тебе припадающе молимся, милостивым Своим Оком призри на раба Твоего (или, рабу Твою) имярек, и простив ему (или, ей) вся согрешения вольная и невольная, виждь скорбь и озлобление его (или, ея), и облегчи е, и мир Свои дав ему (или, ей), человеколюбием и благостию Твоею соблюди его (или, ю), и благословив от всякого озлобления, насилия, мучения, наваждения же, и нападения диавольского изьяти и избавити того (или, тую) изволи. Ты бо Един еси вземляй грехи мира, и недуги и болезни наша понесый, и источник цельбам, и Врач душам, и телом нашим: и Тебе славу возсылаем со Безначальным Твоим Отцем, и со Пресвятым и Благим и Животворящим Твоим Духом, ныне и присно, и во веки веков.
Предстоящии же рекше: Аминь.

Заклинатель чтет со умилением псалом 90. Живый в помощи: Абие же предстоящии поют настоящий канон тихим гласом со умилением: аще ли ирмосы точию поют, тропари канона един от священных, или сам заклинатель во услышание и разумение предстоящих со умилением чтет.

(После канона, который приведён выше, идёт следующее):

По сих знаменает себе заклинатель крестным знамением, трижды, глаголя:

Во имя Отца, и Сына, и Святаго Духа. Аминь.

И чтет псалом 69: Боже, в помощь мою вонми: до конца.

Посем беснаго, аще лютый есть, связанно и крепко держима пред собою имея, десницы своея персты того касаяся, крестообразно благословляет, трижды, глаголя: Во имя Отца, и Сына, и Святаго Духа. Аминь.

Посем обращься к востоком, и став перед святыми дверьми, паки знамением крестным себе вооружая, глаголет:

Упование мое Отец, прибежище мое Сын, покров мой Дух Святый: Троице Святая, слава Тебе.

И сия:

Вся ангелов воинства, Предтече Господень, Апостолов доенадесятице, святии вси с Богородицею сотворите молитву, во еже спастися нам.

Владычице и Мати Избавителя, приими моление недостойных раб твоих, да ходатайствуеши к рождшемуся от тебе. О Владычице Мира, буди ходатаице!

Воздев же руце горе со умилением глаголет: Отче наш:

Посем рек: Со умилением колена приклоньше вси, Господу помолимся.
Вси приклоньше колена умиленно поют: Господи помилуй, трижды.

Заклинатель же, на коленех стоя, со всяким умилением, аще же мощно и со слезами чтет молитву сию:

Господи Иисусе Христе Боже наш, всея твари Творче и Содетелю? Живаго и Безначального Отца Сыне Собезночальне и Сопресносущне, многаго ради и безмерного Твоего человеколюбия, апостолом своим власть давый, еже наступати на змия, и на скорпия, и на всю силу вражию, и еже о Имени Твоем бесы изгоняти, от нихже и аз недостойный другдругоприимательне, Твоим человеколюбным смотрением сие достойно приим, Твое великолепое и всестрашное Имя,  со страхом и трепетом во смирении мнозем призывая, тебе Владыце моему рабски молюся, призри на мя недостойного и непотребного раба Твоего, и презрев моя вся согрешения, вольная и невольная,  укрепи мя ныне на брань сию, дерзновение ми подавая и силу, еюже победим быв  сатана, яко молния с небесе низпаде: яко да и аз тою вооружен, крепко побежду и сокрушу лютаго сего и лукаваго змия силы. Твоя бо есть держава, сила же, и царство, и слава, со Безначальным Твоим Отцен, и Пресвятым, Преблагим, и Животворящим Твоим Духом, ныне и присно, и во веки веков. Аминь.

Абие же востав, водою священною кропит себе и беснаго, и всех предстоящих, глаголя: Сила и действо Всесвятаго и Животворящаго Духа, освятившаго воду сию, да свободит тя от всякаго насилия и обстояния вражия: и нас всех да утешит.

По сем глаголет: Благословен буди день и час, воньже Господь и Бог наш Иисус Христос Родися от Девы Марии, на сотрение и разрушениедиавольскаго мучительства, и во спасение верных.

Держиму же крепко бесному, стоящу к востоку лицем, заклинатель знаминает себе крестным знамением, крепкою верою и велиим дерзновением, глаголея:

Во Имя Отца, и Сына, и Святаго Духа, повелеваю вам вселукавым, скверным, и нечистым духовом, пришедшим зде в помощь и заступление сему бесу (или, сим бесом), раба Божия сего (или, рабы Божия сея) имярек, душу и тело мучащему (или, мучащим), и запрещаю вам казнию низриновения в геенну и езеро огненное, и во тьму кромешнюю, силою и действом Пресвятыя Живоночальныя  и Нераздельныя Троицы, на лет сто, яко да не дерзнете ниже возможете ни в чесом же защищение, помощь же или заступление ему (или, им) быти: но абие да отыдите в место идеже вам Божие смотрение назнаменовало есть пребывати. Убойтеся, бежите, и устранитеся, превеликаго, страшного, сильнаго, и великаго Имени Вседержителя Бога нашего: и державныя сили воображения знамения Честнаго и Животворящяго Креста, Господа нашего Иисуса Христа, имиже попрана и испразднена бысть немощная ваша сила и мучительская власть.